640

320

Почитувани членови на АЦИ ‒ Здружение на финансиски пазари,

Почитувани гости, дами и господа, 

Ми претставува особена чест да ги поздравам учесниците на 25-тото годишно собрание на Здружението на финансиски пазари, коешто виртуелно се одржува во година на исклучителни предизвици, како за меѓународните финансиски пазари, така и за финансиските пазари кај нас.

Во економската историја, пандемијата на ковид-19 најверојатно ќе биде запаметена како еден од најголемите шокови на 21 век, којшто синхронизирано ги погоди речиси сите земји во светот. Според проекциите на ММФ, за оваа година се очекува дека само 26 земји во светот ќе бидат во зоната на позитивен раст. Оваа криза, за разлика од големата финансиска криза (во 2008‒2009 година) и други претходни кризни епизоди не е резултат на порозни економски фундаменти, или, пак, на нерамнотежи и слабости во финансискиот сектор. Ова е здравствена криза, но сепак е криза којашто со оглед на рестриктивните мерки и нарушената доверба многу брзо се прелеа во реалната економија. Мерките преземени за заштита на здравјето, иако се неопходни, во глобални рамки доведоа до остар пад на економската активност. Ова особено беше изразено во вториот квартал, кога економијата влезе во фаза на т.н. „индуцирана кома“, со силни ефекти и врз понудата и врз побарувачката. Сето ова доведе до ризици и очекувања за можна негативна повратна спрега помеѓу реалниот и финансискиот сектор.

Финансиските пазари, коишто во голема мера се под влијание на очекувањата за идните движења (англ. forward looking nature), реагираа брзо. На почетокот, кога проблемите навидум беа главно во источна Азија, пазарите забележаа умерени реакции. Но, како што вестите за нагло ширење на вирусот во Европа зачестија кон крајот на февруари, пазарите на капитал започнаа да бележат надолна корекција и зголемена променливост на движењата.