Музејска поставка

По речиси две години од моментот кога беше формирана, а како резултат на систематски откуп и на донации на граѓани, збирката беше значително збогатена, по што се создаде можност за нејзино презентирање пред пошироката јавност. Интензивните подготовки за музејската експозиција траеја една година и на 25 април 2002 година, по повод десетгодишнината од монетарното осамостојување на Република Македонија, во просториите на НБРМ беше отворена нејзината постојана нумизматичката поставка “Македонија, парите и историјата”, придружена со соодветен каталог на изложените примероци.

Во музејската експозиција на Народната банка на Република Македонија е даден хронолошки преглед на монетите кои циркулирале и кои биле ковани на територија на Република Македонија од VI/V век пр. н.е., па сè до денес. Експозицијата е сместена во приземјето на зградата на НБРМ.